গুৱাহাটী কেন্দ্ৰীয় কাৰাগাৰৰ ১৭০ জন কয়দীৰ দেহত কৰ'ণা ধৰা পৰাৰ পিছত চিকিৎসাৰ বাবে সোণাপুৰৰ টেপেচিয়াস্থিত এল.এন.আই.পি চেন্টাৰত ভৰ্তি কৰোৱা হৈছিল । শুকুৰবাৰে নিশা কয়দীসকলে চেন্টাৰত উপদ্ৰৱ চলোৱাৰ বাবে আৰক্ষীয়ে ৰাউণ্ড-ফায়াৰ কৰিবলগীয়া পৰিস্থিতিৰ সৃষ্টি হয় ।ঘটনাস্থলীত গুৱাহাটীৰ আৰক্ষী অধীক্ষক মুন্না প্ৰসাদ গুপ্তা উপস্থিত হৈ পৰিস্থিতিৰ বুজ লয় । আৰক্ষী অধীক্ষক গৰাকীয়ে জনাই যে- চিকিৎসাধীন হৈ থকা কয়দীসকলৰ মাজৰ পৰা দুজন কয়দী বৃহস্পতিবাৰে পলাই গৈছিল । পুনৰ শুকুৰবাৰে কয়দীয়ে পলাই যোৱাৰ উদ্দেশ্যে বিল্ডিঙৰ পৰা নামি আহিছিল । উক্ত চেন্টাৰত উপস্থিত থকা চিকিৎসা-কৰ্মী আৰু আৰক্ষীয়ে তেওঁলোকক নিজ নিজ কোঠালৈ যাবলৈ কৈছিল যদিও তেওঁলোকে কোনো কথা শুনা নাছিল । পৰিস্থিতি কিছু বেয়াৰ ফালে ঢাল খোৱা দেখি আৰক্ষীয়ে নিয়ন্ত্ৰণৰ বাবে ৰাউণ্ড-ফায়াৰ কৰিবলগীয়া হয় । বৰ্তমান পৰিস্থিতি সুস্থিৰ অৱস্থালৈ ঘূৰি অহাৰ লগতে সুৰক্ষা ব্যৱস্থা আগতকৈ আৰু অধিক কটকটীয়া কৰা হৈছে।
সোণাপুৰৰ পৰা চন্দন মালাকৰৰ প্ৰতিবেদন টাইমলাইন অসম।।
댓글